Temporaryo karon nga nag-una sa liderato ang Jiboren Team human sa ilang gipukan ang Tambuli, 78-72 sa nagpadayong aksiyon sa Lapu-Lapu Basketball Association (LLBA) 3rd Fiesta Conference niadtong Hulyo 27 didto sa Datag gym sa dakbayan sa Lapu-Lapu.
Ang Jiboren Team mipatuman sa ilang hugot nga depensa samtang sila si Olan Velasquez ug Ram Gomez wala magpalilong sa ilang pagpangataki aron malumpag ang Tambuli, kinsa nagbitbit na karon og 1-1 win-loss record human nila napukan ang F5 Team.
Si Velasquez maoy nangulo sa maong kadaugan pinaagi sa iyang 14 puntos, samtang si dela Peña adunay 13 puntos ug si Gomez mihirit og 12 puntos. Si Billy ‘Chicoy’ Nadado wala kaayo makahuygo ug igo lang kini nakahimo og dos puntos.
Sa laing duwa, ang Yan C Rico nidaog sab og sayes puntos batok sa F5 Team sa iskor nga 88-82.
Ang Yan C Rico nga gipangulohan ni Rey Inot sa iyang 15 puntos nagbitbit na sab karon og balanseng 1-1 nga baraha, samtang ang F5 Team wala pa makatilaw og daog sa duha ka duwa.
Niapil sa maong torneyo nga gipaluyohan sab sa ilang Brgy. Capt. Joseph Pangatungan mao si defending champion John Videoke ni Elly Gomos, Tambuli Beach Resort ni Xavier Castueras, Inner ‘J’ Spa ni Barangay Councilor Russel Abing, Team F5 ni Fernando ‘Dondon’ Sinco, Jiboren Convenience Store ni Ruby Cabasa, Harumi nilang Archi Ompad ug Eddie Bontes ug Yan C Rico ni Atty. Rico Amores.