8th CESAFI sugdan na

Sugdan na karong adlawa ang 8th season sa Cebu Schools Athletic Foundation,  Inc.  (CESAFI) pinaagi sa grand opening ceremonies nga gikatakda sa ala-1:00 sa hapon diha sa Cebu Coliseum.

Mga duwa karon

(Cebu Coliseum)
1:00 pm
Opening Ceremonies
4:00 pm
UC vs. USP-F (Jrs.)
5:30 pm
UV vs. USC (Srs.)

Ang grand rematch tali sa seven-time champion University of the Visayas (UV) Green Lancers ug ang finalist sa miaging tuig University of San Carlos (USC) Warriors maoy magsangka sa main game sa alas-5:30 sa hapon.

Sa dili pa ang ilang UV-USC showdown, ang University of Cebu (UC) Webmasters makigbugno una sa University of Southern Philippines (USPF) Baby Panthers sa season-opening game sa alas-4:00 sa hapon.

Daghan karon ang nag-atang sa bag-ong iparada nga mga players sa Lancers kinsa nahimo na karong “more vulnerable” tungod kay wala na ang towers of power sa UV ug sa scoring demons sama nilang 6-foot-8 Rino Berame, 6-foot-6 Ariel Mepaña, Eduardo Arda, Michael Luga ug Morsie Akad.

Ang 6-foot-11 nga si Gregory Slaughter mao na lang ang bugtong higante nga magtikawtikaw sa kampo sa UV Lancers. Si Slaughter nagkinahanglan og suporta nilang Boniber Sendrijas, Edrian Lao, Eulogio Lasala Jr., Chris Diputado, Ritchum Dennison, Harry Von Lanete ug sa rookie Jerome Silva aron mogaan ang iyang trabaho.
Depende hinuon kini unsaon pagdiskarte sa USC Warriors ang ilang duwa.  Ang USC Warriors nikuha ni Fil-Australian John Emil Rowe kinsa maoy mo-abag ni Enrico Llanto ug Joven Cid Cortes sa ilawom.

Lain pang strong title contenders sa collegiate division mao ang University of San Jose-Recoletos (USJ-R) Jaguars ug Southwestern University (SWU) Cobras, kinsa  bag-o lang nakampiyon sa 1st Lionel E. Bacaltos Mayor’s Cup Basketball Tournament didto sa Sibonga Sports Complex.

Molamas sa grand opening karong adlawa  mao ang pagpili og “Miss CESAFI 2008” sa junior ug senior divisions.