CESAFI ning tuiga sakto  sa tapad

Kadaghanan sa mga local coaches nagtuo nga ang 2008 season sa Cebu Schools Athletic Foundation, inc. (CESAFI) nga buksan ugma diha sa Cebu Coliseum, maoy labing balanse ug maoy labing nindot nga kompetisyon itandi sa nangaging katuigan diin walay lain nahimong kampiyon kun dili ang University of the Visayas (UV) Green Lancers.

Ilang gihimong sukdanan sa  pagpaniid mao ang pagkawagtang sa mga higante sa Lancers nga sila si 6'8 Rino Berame, 6'5 Ariel Mepaña ug 6'4   Eduardo Arda uban nilang 6'3 Michael Luga ug 6'2 Morsie Akad.

Ang 6'11 nga si Gregory Slaughter mao na lang ang bugtong higante nga motikawtikaw sa UV aron ilang makab-ot ang ilang ikawalong korona.

Si Slaughter mao karon ang tower of power alang sa Lancers apan wala siya mabalaka bisa’g nawad-an na siya’g suporta sa ilawom kay daghan pa sa iyang mga teammates ang moabag kaniya ilabi na ang ilang mga outside shooters.

Tungod kay dili na kaayo dominante ang poste sa UV, si Slaughter makasugat na unya og gamay nga kalisdanan kay ang 6'7 nga si Junemar Fajardo sa University of Cebu (UC) Webmasters daku na kaayo’g kalamboan sa iyang duwa ug posibleng maoy babag ni Slaughter aron dili na siya makayano og pamuntos sa ilawom kay aduna na may mobabag kaniya.

Daku sab ang pagtuo sa mga local coaches nga ang top four sa miaging tuig mosulod  gihapon ning tuiga.

Kini mao ang UV Lancers, USC Warriors, USJ-R Jaguars ug ang SWU Cobras.

Walo ka teams sa collegiate ug walo sab sa secondary ang mosalmot sa CESAFI niini nga season kay mibalik man ang Cebu Eastern College (CEC) Dragons.