Si WBO bantamweight champion Gerry 'Fearless' Peñalosa mobisita na usab sa Sugbu aron pagsaksi sa "Rambulan sa Liloan" boxing promotion diin mowadwad sa main event ang iyang boksidor nga si Michael Fareñas (21-2-2, 18KOs) karong gabii didto sa Panphil B. Frasco Memorial Sports Complex sa lungsod sa Liloan, amihanang bahin sa Sugbu.
Ang 24-anyos nga si Fareñas, kinsa atua na karon magbase sa Foothill Ranch sa California, makighilam-osay og kumo ni Thai featherweight prospect Boonmee Sithsrivinitwitthayakom.
Bisan og walay titulo nga malangkat, mahinungdanon gihapon kaayo ang maong away ni Fareñas gumikan kay mao man kini ang yawi sa mas daku ug makadani nga away sa umaabot.
"Si Gerry Peñalosa mo-anhi aron personal nga mohatag og suporta sa iyang boksidor. Si Gerry man gud maoy manedyer ni Fareñas," matud pa sa beteranong matchmaker nga si Willie Flores. Niadto lamang Sabado niabot dinhi si Peñalosa aron pagtambong sa "Laban na Banal" card diha sa Cebu Coliseum.
Si Peñalosa (53-6-2, 36KOs) gikatakda nga manalipod sa iyang WBO title batok sa Mexican challenger Nestor Rocha (19-1, 6KOs) karong Septiyembre 20 didto sa Mindanao Civic Center sa Tubod, Lanao del Norte.
Mao kini ang ikaduhang pagdepensa ni Peñalosa sa bakus nga iyang nailog human pakamanga sa ikapitong hugna ang kanhi kampiyon nga si Jhonny Gonzalez atol sa Boxing World Cup niadtong Agosto 2 sa miaging tuig didto sa Arco Arena sa Sacramento, California.
Kun modaog si Fareñas, moaway kini sa undercard sa kumbati nilang Peñalosa ug Rocha batok ni Hussein Pazzi (17-8-1, 7KOs) sa Tanzania alang sa interim WBO Oriental featherweight championship.
Sa kulbahinam nga supporting bouts, si kanhi PABA light flyweight champion Marvin 'Leyte Bomber' Tampus makigsangka batok ni Jonrey Verano sa Valencia, Bukidnon, samtang si Jonathan Baat sa Cebu moharong batok ni Daniel Diolan sa Zamboanga.
Lain pang moaway sa maong kulbahinam nga pinaksitay nga gipasiugdahan sa MP Promotions ni Pinoy ring superstar Manny Pacquiao inabagan sa Rex 'Wakee' Salud Promotions International ug lokal nga kagamhanan sa Liloan ubos sa liderato ni Mayor Vincent Franco 'Duke' Frasco mao sila si Rodulfo Sumabong batok Renan Branzuela, Jason Siaton batok Elmar Francisco, Adonis Aguello batok Randy Megriños, Jaime Bermisdo batok Andy Seneres, Jherpaul Valero batok Christian Dave Baliguat ug Ponce de Leon batok Aljered Tuñacao.
Ang maong boxing card walay bayad ug libre sa tanan.