Ginebra miabante sa Finals

Nagkinahanglan pa og overtime ang Barangay Ginebra Gin Kings para mapukan ang Redbull Barakos sa iskor nga 101-97 sa Game-4 sa ilang best-of-seven series sa semi finals sa 2008 Smart PBA Fiesta Conference kagahapon sa gabii didto sa Araneta Coliseum, Quezon City.

Nunot sa maong kadaugan ang Ginebra Kings karun muabante sa Finals sa ika-17 ka higayun sulod sa ilang franchise history isip usa ka koponan sa PBA.Si Mark “The Spark” Caguioa maoy nibagnos og maayo para sa Gin Kings sa iyang 33 puntos lakip na ang duha ka three-point shot sa fourth quarter. Mibahug usab para sa Kings mao ang import nga si Chris Alexander nga miposte og 13 puntos, 18 ka rebounds ug pito ka blocks.

Sa pagsugod sa duwa, walay gusto mubiya tali sa duha ka koponan, sa third quarter mikiat ang sinaligan sa Barakos nga si Cyrus Baguio kinsa mibahug og 17 sa iyang 24 puntos para langkatun tres puntos nga labaw 73-70 pabor sa Barakos. Apan pagsugod sa fourth, kalit lang migana ang opensa sa Gin Kings, usa ka tres gikan ni Caguioa maoy nakatabla sa duwa 90-90 padulong ngadto sa overtime , ug sa pagsugod sa overtime wala na kapugngi ang Gin Kings sa pagsakmit sa kadaugan lakip na niini ang usa ka tres ni Paul Artadi ug slamdunk gikan ni Raffy Reavis.

Ang Ginebra midaug batok sa Redbull sa upat ka sunod-sunod nga higayun sa semi finals, ang Ginebra Kings naghulat nalang karun sa mananaug tali sa Air21 Express ug Magnolia Beverage Masters, ang Express maoy nakabintaha sa ilang serye 2-1