Concepcion mipakamang kang Carrera

Nagkinahanglan lang og tulo ka round ang North American Boxing Federation (NABF)Super Bantamweight champion Bernabe “Kamaong Llave” Concepcion para mapukan si Adam Carrera sa usa ka 10 rounder non-title match didto sa MGM Grand Arena, Las Vegas City.

Ang 20 anyos nga Concepcion (26-1, 15 KOs) mipaluhod sa American-based nga Meksikanung si Carrera (19-4, 8 KOs) sa makaduha ka higayun sulod sa third round, lakip na niini ang usa ka makusog nga left uppercut nga mao nakapabungog sa Meksikano dayun tumba, ug wala na kini makabarug sa dihang giiphan na siya ni referee Joe Cortez. Sa unang round, mipabaha na dayun si Bernabe og mga makusog nga kumo sa lawas ug nawng ni Carrera, nga maoy hinungdan sa daling pagkaluya sa 24 anyos Meksikano.

Ang garbo sa Virac, Catanduanes nga si Bernabe mipasulod sa 42 sa iyang 105 ka kinumo samtang si Carrera igo lang midapat sa iyang 19 sa 136 nga kinumo nga iyang gibuhian. Si Concepcion usab maoy naglabaw sa scorecard sa tulo ka mga hurada nga miiskor og 20-18 pabor kaniya. “He is the next Manny Pacquiao of the Philippines,” matud pa sa Top Rank Promoter nga si Bob Arum.

Sa maong daku na og kahigayunan si Concepcion mahatagan og puruhan alang sa usa ka daku nga world title fight sa umaabot niyang away.