Pasok ang Ginebra
Minsan pang ipinakita ng Barangay Ginebra ang kanilang taglay na ‘never-say-die’ attitude.
Mula sa isang six-point deficit sa huling 2:37 ng fourth quarter, bumangon ang Gin Kings upang igupo ang Red Bull Barakos via overtime, 101-97, sa Game 4 ng kanilang semifinals series patungo sa isang finals stint sa 2008 PBA Fiesta Conference kahapon sa Araneta Coliseum.
“Medyo nakahinga na ng maluwag,” sambit ni coach Jong Uichico matapos wakasan ng Ginebra ang kanilang best-of-seven semifinals wars ng Red Bull sa 4-0 para sa ika-17th finals appearance ng San Miguel Corporation franchise.
Kasalukuyan pang naglalaban ang Air21 at ang Magnolia habang isinusulat ang balitang ito kung saan tangan ng Express ang 2-1 bentahe sa kanilang semis showdown.
Mula sa 90-84 bentahe ng Bulls sa huling 2:37 ng fourth quarter, kumayod sina Jayjay Helterbrand, Paul Artadi at seven-foot import Chris Alexander para itabla ang laro sa 90-90 sa natitirang 43.5 segundo papunta sa extension.
Sa extra period, tatlong freethrows ni Topex Robinson ang nagbigay sa Red Bull ng 93-92 abante sa 4:26 nito kasunod ang dalawang charities ni Rafi Reavis, jumper ni Mark Caguioa at three-point shot ni Artadi para sa 99-94 lamang ng Ginebra sa huling 2:48 nito. (RCadayona)
- Latest
- Trending
