Gidominar sa Yayoy’s Grill and Resto Bar ang duwa gikan sa pagsugod hangtod nahuman aron pagpukan sa I-UTAK, 87-80 sa 2008 San Carlos Boys High Alumni Basketball Association (SCBHABA) season didto sa University of San Carlos-North Campus gym.
Ang Yayoy’s Grill nga gipangulohan ni Rocky Alcoseba wala kaayo makalabaw og daku inig human sa matag kuwarter, apan ila kining nakontrolar hangtod nga nahurot ang oras sa duwa.
Gitak-op sa Yayoy’s Grill ang unang kuwarter sa iskor nga 40-36 ug nihiyos kini ngadto sa dos puntos, 55-53 sa halftime. Apan ang Yayoy’s Grill padayong nakigbisog aron pagkuha og balik sa ilang singko puntos nga labaw, 73-68 sa katapusang 10 minutos sa duwa. Sukad niadto, nakontrolar na sa Yayoy’s Grill ang tibuok kuwarter aron pagposte og daog.
Ang SCBHABA tilt ning tuiga gipaluyohan sa Uniherb Philippines ni Jonathan ‘Atan’ Guardo, ang tiggama og food supplements sama sa Arthro, Kidneycare, Heartvit ug Diabet.
PUNTOS MATAG USA
Yayoy’s Grill (87) - Move 20, Ynclino 17, Abellanosa 17, Alcoseba 10, Gabato 7, Ruiz 6, Bulang 6, Ferrer 4
I-UTAK (80) - Paborada 43, Polo 13, Llenos 8, Balintag 8, Barbarona 8