Magsangka karon ang mga kampiyon sa pagpadayon sa Liga Pilipinas didto sa University of San Agustin Gym sa Iloilo.
Ang three-leg champion M. Lhuillier-Cebu Niños ni Michel Lhuillier ug coach Raul ‘Yayoy’ Alcoseba moharong sa two-leg champion Pagadian Explorers ni Mayor Sammy Co ug coach Eric Samson sa pasiunang duwa nga gikatakda sa alas-4:00 sa hapon.
Kahinumduman, ang Cebu Niños mipukan sa Explorers atol sa Pagadian leg ug ang naulahi nagtinguha nga mobawos sa ilang panag-abot karong adlawa.
Ang Cebu Niños ug Explorers maoy mi-okupar sa unang-duha ka posisyon sa Liga Pilipinas Tour standings nga adunay 37 ug 29 tour points. Mao kini ang ikaupat ug katapusang leg assignment sa duha ka teams sa maong liga nga gipaluyohan sa Samahang Basketbol ng Pilipinas.
Human manghawod sa Ilocos Sur ug Pagadian legs, ang Cebu Niños, naghari sa ilang kaugalingong ML Kwarta Padala Cebu leg niadtong Domingo pinaagi sa pagpukan sa Smart-Pampanga Buddies sa iskor nga 81-73.
Sa main game, ang bag-o lang gikoronahang Lucena City leg champion Quezon Red Oilers ni Gov. Raffy Nantes ug coach Oliver Bunyi mosukod sa abilidad sa host Iloilo Mang Inasals ni coach Jerry Jaranilla nga sugdan sa alas-6:00 sa gabii.