Rodriguez mangulo sa Sugbu

Si Paco Rodriguez maoy mangulo sa aspiring representatives gikan sa Sugbu alang sa World Karting Finals didto sa Suzuka, Japan human niya gidominar ang fourth leg sa Kartzone Karting  Series didto sa Kartzone sa Panagdait, barangay Mabolo, ning siyudad.

Si Rodriguez maoy naghari sa KT-100, ang kategoriya nga napilian sa mga representante sa Sugbu sa Suzuka circuit.

Nakuha ni Rodriguez ang pole position sa iyang impresibong 27.4 seconds qualifying lap. Nakasinati siya og mechanical trouble atol sa first lap, apan nag-una siya sa second heat.

Si Jan-Jan Gonzales misuway og gukod ni Rodriguez, apan nagkasayop-sayop dihang ang iyang makina  nabara sa katapusang tuyok.

Si Patrick Gandionco mitapos sa ikaduha, samtang si Jess Garcia nahimutang sa ikatulo, gisundan nilang Gonzales ug Kaine Gandionco.

Sa laing bahin, si Jette Calderon nakabawi gikan sa iyang kapildihan atol sa third leg pinaagi sa pagdaog sa mini-ROK category.

Naapsan ni Calderon si Kali Carcel sa nahabiling pipila ka laps ug wala na kini molingi pa aron paglangkat sa titulo.

Ang managsuong Carcel nga sila Kali ug Tonyo mitapos sa ikaduha ug ikatulo nga dapit.

Wala sab magpa-alkanse si Bernd Henkenhaf dihang iyang nasakmit ang titulo sa Formula 125 class.