Kawayan nakasud sa semis
Wala magpanaod sa kulbahinam nga duwa ang Kawayan sa ilang engkuwentro batok sa Panagdait-B dihang niposte kini og 97-94 nga kadaugan aron pag-abante sa semifinal sa Barangay Kasambagan SK Sports League 2008 didto sa Kasambagan Sports Complex, ning siyudad.
Kontrolado sa Kawayan ang unang-tulo ka kuwarter ug wala kini batiag kakuyaw dihang miabante kini og 10 puntos paghuman sa third quarter sa iskor nga 62-52.
Sa katapusang singko minutos sa final period, kalit nga miratsada ang Panagdait-B ug nakatabla sa iskor 75-all human sa basket ni Judy Amomonpon.
Sa kasikit sa duwa, nagsinukliay og mga puntos ang duha ka kampo hangtod nga misangko kini sa overtime human magtabla ang iskor, 80-all paghurot sa oras sa regulasyon.
Sa dugang singko minutos nag-iyahay og ilog sa labaw ang duha ka kampo hangtod nga naangkon sa Kawayan ang kadaugan.
Si Joseph Saberon, kinsa adunay 27 puntos maoy topscorer sa Kawayan, ang managsuong si Eric ug Ramil Tuco nagkumboya sa 39 puntos.
Ang Barangay Kasambagan SK Sports League 2008 gipasiugdahan sa Sangguniang Kabataan gipangulohan ni Hon. Erica Daag uban sa abag sa barangay council ubos sa liderato ni Bgry. Capt. Jose “Jun” Lim.
Puntos Matag
KAWAYAN (97) -- J. Saberon 27, E. Tuco 23, R. Tuco 16, Largo 12, Dungog 8, Pepito 6, Lindog 5.
PANAGDA-IT (94) -- J. Amomonpon 30, E. Opoc 18, A. Bonsukan 15, Agulo 9, Survilla 8, Cometa 5, Sycaco 5, Ligan 4.
- Latest
- Trending
