Ang mga boksidor sa “Collision at the Coliseum” fight card gipaabot nga magsinukliay og mga pulong sa ipahigayong news conference nga gihan-ay ni international promoter Sammy ‘Don King’ Gello-ani karong alas-10:00 sa buntag diha sa GV Tower sa eskina Sanciangko ug Osmeña Boulevard, ning siyudad.
Sa main event sa maong walo ka away nga showdown nga gikatakda karong Sabado sa gabii diha sa Cebu Coliseum, ang walay pilding si Ciso ‘Kid Terrible’ Morales (11-0, 7KOs) moharong ni Thai Narongnoi Or Muangklang alang sa World Boxing Organization (WBO) Oriental jr featherweight championship.
Si Ranee ‘K.O. Kid’ Ganoy ug kanhi world title challenger Bert ‘Ninja’ Batawang maoy mokompleto sa triple-header sa maong boxing promotion.
Si Ganoy (21-10, 20KOs) makighamag sa laing bisitang Thai boxer Sapapetch Sor Sakaorat (13-4, 8KOs), samtang si Batawang (47-7, 36KOs), kinsa naghari kaniadto sa WBA Pan-African light flyweight makigharong ni Benjie Soralla (22-13-3, 6KOs).
Lain pa nga mga boksidor nga mopakita’g aksiyon sa undercards mao sila si Balweg ‘Davao Hitman’ Bangoyan (11-0, 7KOs) batok ni Phil Angcamor sa Cagayan de Oro City (14-5-2), Jonghwa Lee sa South Korea (5-0, 1KO) batok ni Brian Diano sa Cagayan de Oro City, Pol Apolinario sa Saranggani Province mosukod sa abilidad ni Jason Layson sa Manila, Marvin ‘Marvelous’ Sensona sa Cagayan de Oro City moaway batok ni Jerome Buntog sa Mandaue City ug Chum ‘Warrior’ Sedillo sa Dumaguete City batok ni Jerry Pahal sa Cebu City.
Ang mga tiket sa “Collision at the Coliseum” nga gipasiugdahan sa SGG Sports Promotions uban sa pakigtambayayong sa Viva Sports, Tanduay Rhum ug Pioneer Elasto Seal mahimo na nga mapalit sa tag P100 alang sa upper box, P200 sa lower box, P300 sa ringside ug P500 alang sa VIP/Sponsor.