Melligen milampos pagdepensa sa iyang RP jr. welterweight crown

Milampos si Philippine junior welterweight champion Mark Jason 'MJM Grand' Melligen pagdepensa sa iyang bakus pinaagi sa sensational first round knockout batok ni Philippine Boxing Federation king Cris Alag atol sa "Fist on  Fire"   niadtong Sabado  didto sa West Negros Gym sa Negros Occidental.

Ang 22-anyos nga si Melligen lumad nga taga barangay Pahanocoy, siyudad sa Bacolod mirapido sa nagbaga niyang kumo ni  Alag hinungdan nga natumba kini sulod lang sa first round.

Ang manghod ni Melligen nga si Gil midaog sab batok ni Rommel Libradilla pinaagi gihapon sa pagtumba sa second round.

Si Melligen, kinsa maoy pambato kaniadto sa Negros Amateur Boxing Association (NABA) nga gipangulohan ni Juan Ramon 'Monju' Guanzon kasamtangan karong mipasilong sa landong sa ALA Stable Gym ni Antonio 'Bidoy' Aldeguer.

Nasayran, si Melligen nikabkab og silver medal sa 23rd Southeast Asian Games niadtong 2005 didto sa University of St. La Salle Gym sa Bacolod. 

Si Melligen nagbitbit karon og 12-1 win-loss record diin   siyam sa iyang mga biktima pinaagi sa  knockout,  samtang si Alag adunay 5-9  nga baraha ug tulo ang knockout.

Si Melligen kasamtangan  karon mitungtong sa ikaduha nga ranking sa World Boxing Organization Asia ug ikaduha sa Pan Asian Boxing Association.

Lain pang midaog sa undercard mao sila si Razem Laud nga midaog pinaagi sa unanimous decision batok ni  Aljerd Junacao, Leonardo Guardiano batok ni  Eman Labanza pinaagi sa majority decision, Nelson Arellano  batok Loloy dela Peña (unanimous decision), Leo Torres  batok Jake Servinia (split decision), Saddam Baramban  batok Keeward Miñoza (2nd round knockout), Merlito Sabellio  batok Edcel Tuñacao (TKO), Reman Salim batok Ruben Santillanosa (technical draw), Gil Melligen batok Rommel Libradilla (2nd round knockout).

 Ang “Fist on Fire” gipasiugdahan sa ALA Promotions uban sa abag sa NABA nga gipangulohan ni Juan Ramon Guanzon.