ALA Gym warriors mohimo'g public workout

Ang mga protagonista sa ALA Gym nga mo-away sa "Laban Na Banal” karong Hulyo 26 mopahigayon og tulo ka hugna nga sparring ugma sa alas-5:00 sa hapon diha sa ALA Gym Fight Club sa Banilad Town Center.

Mao kini ang gipahibalo ni ALA Promotions vice president for promotions Dennis Cañete human sa ilang public workout nga gipahigayon kagahapon didto sa Gaisano Fiesta Mall Entertainment Plaza sa Tabunok,  dakbayan sa Talisay.

Si World Boxing Association (WBA) super flyweight championship contender AJ ‘Bazooka’ Banal mopasingot batok ni Lario Canillas sa Tuburan, Cebu.

Sa iyang bahin, si WBA Intercontinental minimumweight  championship contender nga si Milan 'Milenyo' Melindo moharong sa 20-anyos junior flyweight Jerson Mancio, ang unang Pinoy IDOL champion sa 108-lb. division.

Si Philippine bantamweight champion Michael Domingo makigsinukliay og kusog ni featherweight titlist Weng Haya, kinsa mao karon ang RP no. 7 ug PBF no. 8.

Sa Hulyo 20,  laing public workout ang ipahigayon diha sa SM City-Cebu Activity Center sa alas-3:00 sa hapon.

Ang WBA no. 3 nga si Banal moharong ni Panamanian Rafael ‘Little Bull’ Concepcion alang sa bakanteng superflyweight crown sa main event sa “Laban Na Banal” boxing card diha sa Cebu Coliseum.

Si Melindo moaway sab alang sa bakanteng WBA Intercontinental minimumweight title batok sa laing Panamanian warrior nga si Carlos ‘Shanghai’ Melo. Si Bruce Lee Domingo makigsinukliay og kumo batok ni Indonesian Boxing Association no. 2 contender Rivo Rengkung alang sa bakanteng World Boxing Organization (WBO) Oriental bantamweight title sa  undercard.