USPF Panthers gilupig sa Consolacion selection

Gipilde sa Consolacion selection ang susama nilang abilidad University of Southern Philippines Foundation (USPF) belles sa lima ka set aron paglangkat sa labing unang korona sa Compostela Mayor’s Cup Volleyball Tournament didto sa Compostela Sports Complex.

Ang USPF ni coach Jordan Paca maoy midaog sa first set, 25-19, apan ang Consolacion selection mibawos sa kulbahinam nga second set, 27-25 luyo sa impresibong labok ni Jusabelle Brillo, Florian Guttierez, Janez Armie Ygot, Marites Natad ug Arlene Maloloy-on.

Ang pambato sa USPF nabuhi sa ikatulong hut-ong, 25-21, apan ang habig sa Consolacion abtik sab nga mibawos sa fourth set, 25-23 aron pagpuwersa sa rubbermatch.

Sa deciding set, ang Consolacion mipalig-on sa ilang depensa ug mihimo og makalilisang nga pangatake aron pagpukan sa USPF, 15-12.

Sa maong kadaugan, ang Consolacion selection mibulsa og P10,000, samtang ang USPF og P7,000.