Hapit na nga mahimong hari ang Sugbuanon nga gitawag og prinsipe nga si Cary ‘The Prince’ Bullos sa iyang dibisyon pinaagi sa pagkulit og laing impresibong kadaugan sa prestihiyosong Universal Realty Combat Championship (URCC) XII nga giulohan og “The Supremacy” niadtong Sabado didto sa A. Venue Events Hall sa Makati City.
Ang 24-anyos nga si Bullos mipaundang sa kanhi top blow-by-blow ug beteranong Mixed Martial Arts fighter Arnel Arancina gamit ang talagsaong naked choke sud lang sa usa ka minuto sa unang hugna.
Atol sa gipahigayong weigh-in, si Arancina mitimbang og 138 pounds, mas bug-at og upat ka pounds itandi ni Bullos.
Apan ang Lapu-Lapu City MMA star mipabuhagay sa tanan niyang kusog aron pagpukan sa bisitang kaatbang.
Mao kini ang ikaduhang sunod-sunod nga daog ni Bullos pinaagi sa pagpaundang.
Si Bullos, kinsa gisuportahan sa RUSCO, Junas Fitness Gym ug K-Arts, niposte sab og siyam ka daog pinaagi sa knockout sa tanan niyang away sa MMA.