Miremati na sab og laing korona ang M. Lhuillier-Cebu Niños dihang ilang gidominar ang Liga Pilipinas-Pagadian City Leg pinaagi sa pagpukan sa host Pagadian Explorers, 72-67 niadtong Domingo sa gabii didto sa Pagadian City gym sa Pagadian City.
Ang Cebu Niños ni sports patron Michel Lhuillier ug coach Raul ‘Yayoy’ Alcoseba nagsalig sa 12-0 fourth quarter aron pagpapas sa ilang 57-66 nga alkanse sa nahabiling sayes minutos sa kumbati.
Si Bruce Dacia miugbok og triple, gisundan og laing dos puntos aron pagtabla sa iskor, 66-all.
Ang sentro nga si Marlon Basco miposa og tres puntos nga nakapalabaw sa Cebu Niños og tres puntos, 69-66 sa nahabiling 2:15 sa duwa.
Si Basco, kinsa maoy napiling tournament MVP, ni-foul ni Mark Kong, kinsa igo lang mipasulod og usa sa iyang duha ka free throws, 67-69.
Ang Explorers ni Mayor Sammy Co ug coach Eric Samson mihimo sagunson nga fouls aron pagpatay sa oras diin ang Cebu Niños maoy nakabentaha og maayo sa himalatyong segundos sa duwa.
Si Stephen Padilla maoy katapusang mibarog sa free throw line sa katapusang dos segundos, apan nasipyat ang iyang duha ka free throws. Hinuon, dali niyang gibawi pinaagi sa paglangkat sa offensive rebound ug gitapos ang duwa pinaagi sa pagpabuto og triple dayong kapupos sa oras.
Isip kampiyon, ang Niños nakabaton og 10 Liga Tour points, samtang ang Explorers nakaangkon og singko puntos.
Gumikan niini, ang Cebu Niños maoy mitungtong sa kinatas-ang bahin sa leader board sa kinatibuk-ang 24 puntos ug nahimong first-two leg winner ning maong liga ubos sa Samahang Basketbol ng Pilipinas (BAP-SBP).
Sa laing aksiyon, ang Misamis Oriental Meteors ni Gov. Oscar Moreno ug coach Jun Noel miseguro nga dili kini masirohan sa ilang pag-uli dihang ilang giangkon ang ikatulong dapit dihang ilang gipilde ang Trace-Laguna Stallions ni Erwin Genuino
ug coach Nomar Isla, 102-90.
Sunod semana, ang Zamboanga Amores ug ang Lipa-Batangas Barakos modungan sa pag-host sa managlahing mga binyu nga sugdan karong Hulyo 9.
Ang Amores moharong sa Explorers, Ilocos Sur Brave Hearts ug Taguig Batang Global.
Samtang ang Barakos mobisita sa Baguio Victory, Iloilo Mang Inasals ug Tagaytay-Cavite Heroes.