Koryano daghang itsa, Pinoy daghang dribble: Shin

Matod pa sa Korean legend nga si Shin Dong Pa, ang kalainan sa basketbol sa Pilipnas ug sa South Korea mao —  ang Pinoy mahiligon sa dribble apan ang Koryano mas ganahan mo-itsa sa gawas ug mas daghan  ang ilang shooting fundamentals kay sa ubang matang sa drills.  Si Shin, ang presidente sa Korea Basketball Association (KBA) ug ingon man presidente sab sa Asian University Basketball Federation (AUBF), miangkon nga ang iyang gidala nga Hang Yang University dili kaayo lig-on ug dili pa hanas sama sa gilauman sa mga Sugboanon apan iya kining gituyo og dala dinhi sa Sugbu alang sa nagpadayon nga 6th Asian University Basketball (AUBC) Battle of Champions aron lang gyud mahanas ug mabansay-bansay ang ilang abilidad ilabi na sa outside shooting.

Ang Hang Yang University which lost to the University of the Visayas (UV) Green Lancers sa miaging adlaw, 77-83, maayo kaayo’g mga shooting drillls apan wala’y maayong modala’g bola hinungdan nga kanunay masakpan ang ilang pamaagi o technique.

Apan sa ilang disiplina, wala sa’y ikasaway ang ilang coach kay pulos sila matinumanon kung unsa’y ilang gamer plan bisan sa kakuwang sa ilang abilidad sa pag-dribble.  Gani, wala man sila’g daghang sayop sama sa passing errors kun dili kadaghanan gyud sa ilang sayop traveling violations kay lagi wala man sila’y tarong nga point guard. Silang tanan makamao modala’g bola, maayong mopasa apan menos sa abilidad sa dribbling kung itandi sa atong mas mugbo nga point guards dinhi sa Sugbu  o asang dapit sa Pilipinas.

Dili kahibudngan kay si Shin Dong Pa usa man ka inilang shooter ug natural lamang nga ang shooting sab maoy iyang itudlo. Si Shin kaniadtong  dekada 60, maoy pinakamaayong laki moduwa sa tibuok Asya ug nag-average siya’g 30 ngadto sa 40 puntos mata’g duwa.

Dihay kausa samtang nagduwa sa Asian Basketball Confederation (ABC), si Shin mi-iskor og 50 puntos ug niadtong tungora, wala pa gamita ang three-point shot.

Si Shin mipahiyom lang dihang iyang gihandum nga napili siya isip sakop sa Mythical Five sa Asya niadtong tuig 1972 ug 1973 lakip nilang Masatumo Taniguchi sa Japan, William “Bogs” Adornado sa Pilipinas, Sonny Hendrawan sa Indonesia ug usa ka player gikan sa Iran.  Didto sa Korea, ang KBA nga iyang gipangulohan sa taudtaod nang panahon, adunay duha ka klase sa lega ug kini mao ang Class A alang sa mga professionals sama sa atong PBA ug ang Class B alang sa mga collegiate diin sakop ang Hang Yang University.

Sa umaabot nga Beijing Olympics unya sa Agosto 5-24 si Shin nagkanayon nga ang mga Koryano makakuha’g bulawang medalya sa natad sa taekwondo (men and women), archery, judo, wrestling ug swimming.

Si Shin gi-abagan ni Hyun Mo Park samtang gipakighinabian siya sa Banat Sports sa wala pa sugdi ang press conference nga gipatawag ni Basketball Association of the Philippines-Samahang Basketbol ng Pilipinas (BAP-SBP) president Prospero Pichay, Jr. sulod sa function room sa Coliseum.