Nakaikyas ang John Videoke sa ilang kulbahinam nga kampiyonato pinaagi sa pagpukan sa Tambuli, 99-96 aron ilugon ang korona sa 2nd Lapu-Lapu Basketball Association (LLBA) niadtong miaging adlaw didto sa Lapu-Lapu Sports Complex.
Kontrolado sa Tambuli ang nag-unang duha ka kuwarter luyo sa paningkamot nilang Jasper Lungay ug John Francisco nga nagkumboya og 15 sa first half aron hatagan ang ilang koponan og dos puntos nga labaw, 64-62.
Sa second half kalit nga mihungaw ang kainit sa John Videoke pinaagi sa mga three-point shots nila ni Michael Macasero ug Cacay Versoza aron pag-ilog sa labaw sa labing unang higayon.
Ang Tambuli misuway sa pag-ilog og balik sa labaw sa katapusang kuwarter pinaagi sa pagpatuasik og mga puntos apan ang tanan nilang atake gi-alkontrahan sa John Videoke ubos sa pagpangulo ni Macasero kinsa maoy midaog sa MVP award. Si Macasero maoy topscorer sa John Videoke sa iyang 24 puntos, 14 niini gikan sa fourth quarter.
Sa maong kadaugan, ang John Videoke nibulsa og P10,000, samtang ang Tambuli nakadawat og P7,000.
Sa laing duwa gipatikangkang sa Yan C Rico ang Jiboren aron sakmiton ang ikatulong puwesto sa maong liga.
Ang Yan C Rico gipangulohan ni Amay Palad, kinsa mibugha og 18 puntos, si Rene Cuadra miamot og 10 puntos ug si Alan Sepe nga mihungit og otso puntos. Ang pilderong Jiboren gipangulohan sab ni Pompe Nguho sa iyang 25 puntos, gisundan ni Billy Nadao nga mitampo og otso puntos.
Ang maong liga gipasiugdahan nilang Councilors Russel Abing ug Gerry Agustu uban sa suporta nilang Archie Umpad ug Eddie Bontes sa Brgy. Datag Maribago dakbayan sa Lapu-Lapu.