Nasurpresa og maayo ang Filipino ring superstar nga si Manny “Pacman” Pacquiao kagahapon human niya madiskubrehing ang iyang giidolong National Basketball Association team nga Boston Celtics miidolo usab diay kaniya.
Kini dihang siya giadto mismo sa mga miyembro sa maong team diha sa iyang locker room sa Mandalay Bay Resort and Casino sa Las Vegas, Nevada pinanguluhan ni Celtics superstar Kevin Garnett ug nagpakuha pa og hulagway uban kaniya ug sa team Pacquiao.
Kini nahitabo human gidemolis ni Pacquaio si WBC Lightweight champion David Diaz sulod sa ika-siyam nga round sa nahibiling 36 segundos sa “Lethal Combination” card kagahapon.
“He’s a great fighter,” sumala pa sa Celtics forward nga si Garnett.
“We’re all Pacman fans that’s why we’re here,” dugang pa niini.
Kauban ni Garnett sa maong surpresang pagbisita mao sila si Sam Cassell, Ray Allen, Paul Pierce nga naghugyaw og kinataw-anay samtang nagpakuha og hulagway uban ni Pacquiao samtang nagpunay og singgit og “Manny! Manny! Manny!”
Ang maong kasinatian nakalipay og maayo sa Pinoy boxing superstar kinsa niadtong tungura klaro kaayong nanglabaw ang ngisi samtang giagbayan si Garnett samtang nagpatong sa usa ka bangko.
“Masayang-masaya talaga ako na makita sila,” asoy pang Pacquiao.
Samtang si Cebu City Councilor Sylvan Jakosalem nga nakakita sa away diha sa Parklane Hotel pay-per-view nagkanayon nga bisan si Mayweather wala pa moretiro di kini makatupong kang Pacquiao.
“That was the fastest power left hook I’ve ever seen. Most didn’t even see it and thought Diaz just collapsed. Even if Mayweather didn’t retire, Pacman would still be pound-for-pound number one after this fight,” asoy pang Jakosalem.
Tungod sa maong kadaugan si Pacquiao mao nay labing unang Asyanong boksidor nga naghupot og upat ka world titles sa nagkadaiyang weight classes.
Samtang ang Celtics usab nakakulit na sa ilang ika-17 nga NBA championship human nila makmaka ang L.A. Lakers. Ang labing unang kampeyonato sa Celtics nakuha nila 22 ka tuig na ang nakalabay ug ang katapusan nahitabo niadtong 1986 batok sa Houston Rockets.