Nagpadayon karon ang pagpanguhong sa mga bilyaran sa lainlaing dapit sa lalawigan sa Bohol. Kini ang akong nadiskubrehan sa akong paghitaak sa nagkadaiyang kalungsoran sa maong probinsiya. Akong gikahinangop nga daghang mga Bol-anon ang natakdan sa hilig sa pagdula og bilyar. Basin na lang nga may mosikat nga bilyaristang Bol-anon sa umaabot nga mga adlaw nga takus ikabutang diha sa linya nila ni Efren 'Bata' Reyes, Francisco 'Django' Bustamante ug daghan pang uban.
Gidugok sa mga bilyarista ang bilyaran nga nahimutang sa barangay Balbalan, sakop sa lungsod sa Dimiao, Bohol. Gipaabot nga mas modaghan ang mga bilyarista nga mohugop sa maong dapit sa umaabot nga mga adlaw tungod sa kamaayo sa puwesto niini. Dili layo sa nahimutangan sa maong bilyaran gipadayon pagtukod ang usa ka hotel and resort. Gituohan nga kun operational na unya ang maong resort, makabenepisyo usab niini, sa usa ka paagi o sa lain, ang bilyaran sa Balbalan.
Duna usab ning bilyaran sa barangay Langkis, Duero, Bohol nga puno sa kinabuhi. Magsugod sa buntag hangtod sa kagabhion ang pagdula sa mga bilyarista sa maong bilyaran. Sanglit nahimutang man kini sa highway, sayon ra kaayong tultolon sa mga magdudula nga gustong manulong sa pagpakigsangka sa mga bilyarista sa Langkis. Ingon usab niini ang sitwasyon sa bilyaran nga nahimutang sa Progreso, Alicia, Bohol.
Mas tugob sa kinabuhi ang bilyaran nga nahimutang sa Looc, Jagna, Bohol. Ang lungsod sa Jagna usa sa labing mauswagon nga lungsod sa lalawigan sa Bohol. Ang barangay Looc walking distance ra gikan sa kinapusoran sa lungsod. Gidugok sa daghang mga magdudula ang bilyaran sa Looc, ang Kamayan sa Jagna & Billiard Hall. Sukad sab sa buntag hangtod sa kagabhion ang operations sa maong bilyaran.
Gihisgutan ko gyud kini tungod kay akong nakita nga usa kini ka timaan sa kalamboan sa billiard sport. Kay padayong nanguhong ang mga bilyaran, nagpasabot nga nagkadaghan usab ang mga magdudula sa bilyar. Usa kini ka maayong balita kay ang bisan unsang disiplina sa paugnat sa kusog usa man ka instrumento pag-umol sa kinaiya ug kaugmaon sa usa ka indibidwal.
* * *
(Mga sugyot ug pakisayod? Text sa 0910-8105522)