Pinoy shuttlers naubos lahat
Tiyak nang walang local shuttlers na lalaban para sa final round ng boy’s at girls’ team competition sa 14th ASEAN Schools Badminton Championships.
Ito ay matapos mablangko ang mga Filipino bets, itinampok ang 2008 Palarong Pambansa double gold medalist na si Gelita Castelo, ng mga Thai standouts, 5-0, team competition ng nasabing five-day event kahapon sa Ninoy Aquino Stadium.
Nabigo ang 13-anyos na si Castelo kay Nichaon Jondapol, 9-21, 12-21, samantalang natalo si Camille Yang kay Prangnuch Lerthiran, 6-21, 9-21 at yumukod si Jessalam Sampurna kay Nuttaya Sanlekanun, 14-21, 2-21, sa girls’ singles event.
Sa doubles play, giniba sina Danica Bolos at Abigail Garcia nina Artima Serithamarak at Chayanit Chadchalam, 11-21, 5-21, at iginupo sina Dia Nicole Magno at Rochelle Andres nina Salinee Somsri at Boonsita Thumpanichwong, 8-21, 13-21.
Nakatakdang sagupain ng nagdedepensang Indonesia, ibabandera sina world-ranked Evert Sukamta at Della Destiara, ang Singapore sa semifinals ng girls’ team event ngayong umaga at kakatagpuin ng Thailand ang No. 2 seed Malaysia.
Hindi naman nakaporma si Joper Escueta kay Pisit Poodchalat, isang World Grand Prix qualifier, 12-21, 10-21, sa boy’s singles, habang natalo si Peter Gabriel Magnaye kay Nipitphong Phuangpuaphet, 17-21, 8-21at ginapi si John Robert Ner ni Pawarit Supasri, 17-21, 17-21.
Nabigo rin sa doubles sina Patrique at Peter Magnaye kina Sarayuth Seatung at Sermsin Wongaprom, 10-21, 15-21, kagaya nina Greg Paz at Lance Bautista kina Bodin Isara at Pollawat Boonpan, 14-21, 16-21. (Russell Cadayona)
- Latest
- Trending
