CBM 2nd Techno-Tour Amazing Adventure Challenge: Oracion motimon sa Islands Souvenirs team

Ang nabantog na kaayong triathlete nga si Leo Oracion maoy mangulo sa Islands Souvenirs team sa Cebu Business Month’s 2nd Techno-Tour Amazing Adventure Challenge nga gikatakda karong Hunyo 27 ug 28.

Si Jay Aldeguer, ang manedyer sa Islands Souvenirs, mikompirmar sa iyang partisipasyon sa adventure challenge gumikan kay garbo ug dungog alang kaniya nga si Oracion mangulo sa ilang kampanya.

Nasayran, si Oracion mikulit sa iyang ngan isip labing unang Filipino nga nakaabot sa kinatumyan sa Mt. Everest atol sa unang Philippine Mt. Everest Expedition niadtong 2006.

Si Oracion ug kauban sa  Islands Souvenirs team moliyok sa habagatang Sugbu sud sa duha ka adlaw aron hagiton ang ilang kaalam, accuracy, decision making ug teamwork.

Kapin sa 20 ka pit stops ang pangitaon nga magsugod diha sa SM City-Cebu paingon ngadto sa finish  line sa Paseo.

Ang registration padayon pa niadtong mga kompaniya nga interesadong mosalmot sa 2nd Techno Tour Amazing Adventure Challenge.

Ang registration fee nagkantidad og P15,000 matag team, libre na niini ang accommodation, breakfast, dinner ug  ticket alang sa concert party sa finish line.

Alang sa dugang mga kasayoran, mahimong motawag sa CBM Secretariat sa (032) 232-3958-59 o e-mail sa [email protected].

Mahimo sab nga motan-aw sa website www.cebubizmonth.com.

Ang matag koponan kinahanglan langkuban og upat ka mga miyembro, 18-anyos ug pataas diin aduna kini labing menos usa ka opposite gender.

Ang matag team magdala og AUV, laptop, cellphone, digital camera ug first aid kit. Ang PLDT mohatag sa ilang WEROAM facilities niadtong mga partisipante kinsa walay read wireless access.

Ang kampiyon makadawat og P50,000, ang second placer  mobulsa og P30,000 ug ang third placer makaangkon og P20,000.