Ratliff mahalon nga bench player sa nba

Ang inila ug respetadong magasin sa tibuok kalibotan nga Forbes Magazine, mihingalan ni Theo Ratliff sa Detroit Pistons nga maoy pinakamahalon nga NBA bench warmer pinasikad sa 2007-2008 statistics.

Si Ratliff adunay tinuig nga sweldo nga 12 milyones dolyares nga naghimo kaniya nga labing mahalon nga bench player sa NBA. Siya adunay average nga 13.9 minutos ug nag-average lang og tulo ka puntos ug tulo sab ka rebounds.

Ang ikaduha nga labing mahal nga bench player mao si Raef LaFrenz sa Portland Trail Blazers kinsa adunay 9.9 milyones dolyares nga sweldo. Aduna lang siya’y 7.5 minutos mata’g duwa, may 1.7 ug may 1.7 rebounds.

Nagsunod sa listahan mao si Adonal Foyle sa Orlando Magic nga adunay sweldo nga 8.5 milyones dolyares sa iyang 9.4 nga minutos mata’g duwa. Ang iyang average 1.9 puntos ug 2.5 rebounds. Ang ika-upat sa listahan mao si Kwame Brown sa Memphis Grizzlies nga nagdawat  og sweldo nga 8.3 milyones dolyares ug nag-average lang og 13.6 minutos, 3-5 puntos ug 3.8 rebounds.

Ang kataposan sa listahan mao si Kenny Thomas sa Sacramento Kings nga nagdawatan og sweldo nga 7.1 milyones dolyares sa iyang average nga 12.2 minutos, 1.4 puntos ug 2.7 rebounds. Ang uban nalista nga mahalon nga bench warmers mao ang mga baseball players, football players ug hockey players kinsa wala makaduwa tungod sa piang, wala lang paduwa-a sa coach o banga gyud nga player. (Gabby Malagar)