Coke giyabo sa Ginebra, 91-84

Napugngan sa Ginebra Gin Kings ang import sa Coca-Cola Tigers nga si Jason Dixon nga maoy dakung yawe sa ilang kadaugan sa iskor 91-84 kagahapon atol sa nagpadayon nga Smart-PBA Fiesta Conferecne didto sa Araneta Coliseum.

Ang Gin Kings kinsa misaka na ngadto sa 7-8 nga baraha, mipahamtang og hugot nga depensa ngadto ni Dixon nga igo lang nakahimo’g pito ka puntos alang sa Tigers.

Tungod sa maong kapildehan, nahagsa na sa ikaduhang pwesto ang Tigers kauban ang Air 21 Express kinsa mipatapsing sa Talk ‘N Txt Phone Pals, 112-111 sa miaging adlaw sa parehong 9-6 nga baraha ug mihatag sa Red Bull Barako sa solong liderato sa ilang 9-5 nga baraha.

Si Jayjay Helterbrand maoy nangu sa Gin Kings sa iyang 27 puntos ug gisundan ni Mark Caguioa sa iyang 14 puntos. Ang ilang import nga si Chris Alexander nakapuntos lang ug 13 samtang ang Sugboanong si Junthy Valenzuela mitampo ug 11 puntos.

Tungod kay nagsangki-ig sa iyang opensa si Dixon, ang mas gamay nga import nga si Donald Copeland maoy nangu sa Tigers sa iyang 18 puntos ug ingon man kanilang Nic Belasco ug Cesar Catli samtang si Alex Cabagnot mi-iskor usab ug 17 puntos.