Cobras, Jaguars mag-abot na karon alang sa Game-1

Bag-o ug bug-at nga misyon ang sagubangon sa  tang-ang  Southwestern University (SWU) Cobras sa ilang pakighamag sa University of San Jose-Recoletos (USJ-R) Jaguars sa Game-1 sa ilang "best-of-three" finals sa 1st  M. Lhuillier Kwarta Padala Summer Basketball Challenge karong adlawa diha sa Cebu Coliseum.

Ang Cobras ug ang Jaguars magtige sa alas-6:00 sa gabii human sa tinaktakay nga  duwa alang sa ikatulong dapit tali sa University of San Carlos (USC) Warriors ug Asian College of Technology (ACT) Cyber Knights  nga gikatakda sa alas-4:30 sa hapon.

Dili sayon ang dalan nga gikamang sa Cobras ngadto sa finals. Napilde sila sa una nilang duwa batok sa ACT human mitapos sa eliminasyon isip fourth seed.

Gikinahanglan una nilang pildihon duha ka higayon ang USC Warriors sa wala pa tukba  ang  luna sa kampiyonato.

Ning higayona,  lain na sab nga hagit  ang atubangon sa Cobras sa ilang panagsangka batok sa Jaguars. Rematch kini nila sa finals gumikan kay nag-abot man sab sila sa labing unang kampiyonato sa Visayas Amateur Athletic Association (VAAA) diin ang Jaguars maoy mipatigbabaw duha na ka tuig ang milabay.

Ning higayon, sandigan sa Cobras mao ang tag-as  ug  pulos sab mga tirador nga  sila si Ritchie Jalandoni, Clifford Maguate ug Eric Zanoria. Apan ang labing hait nilang hinagiban mao  si Alfred Belanda  ug ingon man ang duha ka idlas nga pointguards nga sila si Lloyd Poligrates ug Ard Django.

Hinuon dili sab mabintahaan ang Jaguars tungod  sa presensiya sa upat niining mga beterano nga sila si John Malinao, Lyndon Gudez  ug  Luther  Luke ug ingon man ang tang-an nilang guwardiya nga si Armand Ponce.