Diabet '88 yanong mipukan sa Gemmary

Talagsaong duwa ang gipakita sa Diabet ‘88 aron paglubong sa Gemmary sa iskor nga 103-84 sa nagpadayong aksiyon sa 2008 San Carlos Boys High Alumni Basketball Association (SCBHABA) season didto sa University of San Carlos (USC)-North Campus gym.

Makabungog nga 45 puntos ang gipabuto sa guwardiyang si Edmund Odulio aron pangulohan ang Diabet. Si John Andrew Auza  mibugwal og 20 puntos, samtang si Dindo Sausa miabuno og 18 puntos.

Ang Diabet ni team manager ug Sambag I Brgy. Capt. Jerry Guardo milabaw og siyete puntos sa halftime sa iskor nga 55-48, apan mipakita kini sa makalilisang nga pangatake sa third quarter aron pagpaburot sa ilang labaw ngadto na sa 17 sa iskor nga 89-72 paghuman sa maong kuwarter.

Nakontrolar sa Diabet ang ilang double digits nga labaw hangtod na sa pagkahurot sa oras sa ilang engkuwentro.

Ang Diabet  usa sa mga inilang  food supplements  nga gigama  sa  Uniherb Philippines ni sports patron Jonathan 'Atan’ Guardo. Lain pa nga food supplements nga giapod-apod sa Uniherb Phils. mao ang Arthro, Heartvit ug Kidneycare.

Puntos Matag Usa

DIABET (103) -- Odulio 45, Auza 20, Sausa 18, Pagapulaan 10, Pilapil 10

Gemmary (84) -- Gacayan 40, Wong 31, Sabornido 5, Cabalida 5, Serrato 2, Sabornido 2