Igong kusog ug gikusgon

Makadaghan ko na kini hisguti apan sa ngadto-ngadto akong nakita nga mas daku ang panginahanglan sa dugang paghisgot niini. Kini ang hinungdan nga gibanhaw ko na sab kining maong hilisgotan aron magpabiling lab-as kanunay sa panumdoman sa mga magdudula ang kamahinungdanon niini.

Ang igong kusog o hustong gikusgon sa pagtira importante kaayo kun maoy tuyo ang usa ka impresibong resulta sa tayada. Gawas sa malampusong pagpasulod sa bola (object ball) ngadto sa pocket, makahatag pa gayod kini'g kasayon sa pagtira sa laing opening sa tayada. Sa ingon, mas daku ang kahigayonan sa pagdaog.

"Play the shot with sufficient strength," nagkanayon si Ashok Kumar nga maoy tagsulat sa librong Snooker and Billiards.

Dili ta makalalis sa maong pamahayag ni Kumar kay klaro man kaayo nga ang pag-apply og hustong kusog ngadto sa tako atol sa pagtira maoy dugokan sa kalamposan sa pagpahigayon sa usa ka tayada. Mao kini ang gitamdan sa dagkung mga ngalan sa billiard karon ug namatud-an kini nga epektibo diha sa ilang kalamposan.

Sa imong pagtira, kinahanglang imong banabanaon ang kusog nga imong i-apply ngadto sa tako aron nga, inig sulod sa object ball ngadto sa pocket, ang bolamano mohunong usab sa dapit sa lamesa diin gusto mong adto kini mohunong. Sa maong paagi matuman ang gihikay mong preparasyon sa dula ug dili ka magpunay og pangagho ug pagpanglingo. Dili kini usa ka sekreto kondili usa ka dayag ug praktikal nga taktika nga gisagop sa kadaghanan sa mga banggiitang bilyarista sa kalibotan.

Lisud ang pagkontrolar sa kusog  sa sinugdan. Apan sa ngadto-ngadto makakontrol ka na sa imong kusog kun magbansay ka kanunay. Diha sa pagbansay makat-onan mo ang daghang mga butang nga mapuslanon kaayo sa pagdula. Pinaagi sa pagbansay, mora'g mabuka ang imong mga mata sa kamatuoran ug madiskobrehan mo ang daghang mga paagi sa epektibong pagdula, lakip na ang pagkontrolar sa kusog.

* * *

MAGBILYAR TA TEXTMATE PORTION: 0918-4852112, 0910-9708244, 0909-4106633, 0909-3884390, 0909-4466196 ug 0909-2925083. Text na!

* * *

(Mga sugyot ug pakisayod? Text sa 0910-8105522)