Hingpit na nga naangkon sa Southwestern University (SWU) Cobras ang katapusan luna sa finals human gibihag ang University of San Carlos (USC) Warriors sa ikaduhang higayon, 77-66 sa 1st M. Lhuillier Kwarta Padala Summer Basketball Challenge niadtong Huwebes sa gabii diha sa Cebu Coliseum.
Gumikan niini, ang Cobras maoy nakaangkon sa katungod nga makighamag sa University of San Jose-Recoletos (USJ-R) Jaguars alang sa kampiyonato. Ang Game-1 sa "best-of-three" series gikatakda karong Lunes sa alas-6:00 sa gabii.
Walay laing mabasol ang Warriors sa ilang kapildihan kondili ang ilang kaugalingon gumikan kay sa higayon nga mo-aksiyon sila og rally, sila ra sab maoy moputol niini gumikan sa sunod-sunod nilang krusyal kaayong mga sayop.
Sa dihang naglabaw lamang og kuwatro puntos ang Cobras, 63-67 sa nahabilin nga 2:25 sa duwa, ang pambato sa Warriors nga si Sam Jordan Hermosa nasipyat sa iyang lay-up bisan og wala kaayo kini piita og bantay.
Human niini, ang ilang pointguard nga si Paul Joven natawgan og three-second violation ug dayon ang Warriors nakamugna og dakung sipyat sa depensa nga miresulta ngadto sa breakaway lay-up ni Ard Django nga nakapainat sa labaw sa Cobras, 69-63 sa katapusang dos minutos sa duwa.
Katapusang nakasikit ang Warriors sa iskor nga 66-69 human sa 3-pointer ni Eddie Bakker kay sila si Lloyd Poligrates ug Ritchie Jalandoni miburak og unom ka sunod-sunod nga puntos nga nakahatag og kasiguroan sa kadaugan sa Cobras.
Si Django milansang og duha ka free throws sa nahabiling 20 segundos alang sa final score.
Si Poligrates mikulit og 16 puntos alang sa Cobras, samtang sila si Eric Zanoria ug Clifford Maguate mipupo og 14 puntos matag usa. Si Jalandoni midonar og 10 puntos.
Si Giovanni Padillo maoy nangu sa naparot nga Warriors sa iyang 16 puntos. Si Hermosa nalimitahan lang og 10 puntos.
Puntos Matag Usa
SWU (77) - Poligrates 16, Maguate 14, Zanoria 14, Jalandoni 10, Belande 9, Django 7, Armecin 3, Ceniza 2, Litorja 2
USC (66) – Padillo 16, Hermosa 10, Cortes 8, Bautista 8, Blanes 6, Gallarde 5, San Juan 4, Bakker 3, Codilla 2, Igao 2, Joven 2
Quarterscores:
18-18, 34-28, 54-49, 77-66