Hugot nga depensa ug nagpungasi nga opensiba maoy gihimong hinagiban sa Arthro-Atan Guardo paglubong sa Green Apple sa iskor nga 72-53 sa nagpadayong aksiyon sa Brgy. Pasil Summer Basketball League didto sa Pasil Sports Complex.
Luyo sa nagbagang mga kamot ni Emie Gaviola, Suba councilman Dennis Jaca ug Pardo Brgy. Capt. Danny Lim, ang Guardo Boys mibulhot dayon pagsugod aron paglubong og 17 puntos paghuman sa unang kuwarter.
Bisan pa sa kalawom sa lubong, ang Green Apple nakamaneho gihapon paglaslas sa labaw ug miabot na lang kini og kuwatro puntos, 50-54, apan sila Patring Abesia Jr., Gaviola ug Jaca nagkahiusa aron luwason ang Arthro alang sa ilang ikaduhang kadaugan sud sa upat ka duwa.
Sa laing bahin, ang Pink Nivets mipukan sa White Boys alang sa ilang ikaupat nga sunod-sunod nga kadaugan.
Si Amick Vertudazo maoy nangulo sa Nivets nga mibugha og 15 puntos, gisundan ni Antik Leyson nga miabuno og 13 puntos.
Puntos Matag Usa
ARTHRO (72) -- Jaca 17, Gaviola 15, Lim 12, Delantar 10, Rodil 6, Cane 6, Maranga 2, Lauza 2, Abesia 2.
GREEN APPLE (53) -- Patalinghug 11, Mabala 8, Baguio 6, Ocaba 6, Tulod 4, Sable 4, De la Torre 4, Igot 4, Abejo 4, Tajanlangit 2