Gibasura sa Cebu Schools Athletic Foundation, Inc. (CESAFI) Board ang resignasyon ni Felix O. Tiukinhoy, Jr., kinsa nagtinguhang mokanaog sa iyang katungdanan isip commissioner.
Milutaw ang maong balita kagahapon human sa tigum sa CESAFI Board didto sa Gustavia Restaurant nga gipasiugdahan ni CESAFI president Engr. Rolly Villa sa University of Southern Philippines Foundation (USPF).
Inay nga dawaton, gibalik hinuon si Tiukinhoy sa naandang puwesto. Isip pagsaulog sa iyang kadaugan human sa nasinati niyang kontrobersiya, si Tiukinhoy nagkanayon nga iyang tigumon ang CESAFI athletic directors sunod semana aron pangandaman ang umaabot nga 2008-2009 season.
Si Tiukinhoy miluwat sa iyang katungdanan niadtong Disyembre 2007 dihang wala sila magkasinabtanay sa ubang mga coaches kinsa gustong mosalmot sa liga nga wala paluyohi sa CESAFI.
Miulbo og maayo ang kontrobersiya niadtong Marso atol sa pagpahigayon sa National Students Basketball Championships (NSBC) dinhi sa Sugbu dihang wala magpapugong ang University of the Visayas (UV) Green Lancers, Southwestern University (SWU) Cobras ug University of San Carlos (USC) Warriors.