Lomar Sniper kampiyon na
Gipakita ang talagsaong katakus sa Lomar Sniper aron maka-ikyas sa Lawis Ughoy pinaagi sa pagpilde, 57-51 ug ingon man pagsakmit sa titulo sa 14-17 age category sa 1st Barangay Captain Larry Monsanto’s Cup niadtong miaging gabii didto sa Sitio Laguna Hardcourt sa Lorega San Miguel, ning siyudad.
Ang Lomar Sniper milabaw lang og dos puntos sa first quarter, 13-11, apan tungod sa ilang paningkamot ug determinasyon, kalit nga mitubo ang ilang labaw ngadto na sa 12 puntos, 26-14 sa first half.
Bisan pa niini, wala mopakita og kaluya ang Lawis Ughoy diin padayon kining nakigsambunot aron makan-an ang labaw sa Lomar Sniper, 27-33.
Wala sab hinuon magpadala sa hulga ang Lomar Sniper ug padayon kini nanikaysikay alang sa ilang kadaugan.
Dobleng kadaugan ang naangkon sa Lomar Sniper kay ang ilang sinaligan nga si Cabrera, kinsa maoy nangulo sa kadaugan sa iyang 18 puntos mao man ang milangkat sa MVP award.
Ang pilderong Lawis Ughoy gipangulohan ni Bacus sa iyang 12 puntos.
Sa laing bahin, gipaabot nga kulbahinam nga aksiyon ang ipabuhagay sa Lawis Ughoy ug Cañares Icons sa ila unyang sa finals ubos sa 13-bellow sunod semana.
Ang 1st Barangay Captain Larry Monsanto’s Cup gipasiugdahan sa Lorega San Miguel Barkadahan Basketball Association (LSBBA) sa paningkamot ni Reuel 'Tawi' Robles uban sa suporta sa Norkis Yamaha, Stitches and Wear, San Miguel, Pepsi ug Julie's Bakeshop.
PUNTOS MATAG
LOMAR SNIPER (57) -
Cabrera 18, Gimeno 13, Natural 11, Mitaran 5, Villajor 4, Cabrera 3, Genson 3.
LAWIS UGHOY (51) -
Bacus 12, Magdassal 8, National 8, Idaño 6, P. Mabaga 5, Ruelan 3, Mabini 3, J. Mabaga 2, Etcuban 2, Montejo 2.
- Latest
- Trending
