Gilatos og maayo sa RCAF nga gipangulohan ni Romeo Faunillan ang ilang karibal nga LBSM, 93-84 aron pagsakmit sa korona sa Punta Princesa Sports Association (PPSA) Barangay Cup 2008 niadtong Sabado didto sa Vicente Sotto Memorial gym sa barangay Punta Princesa, ning siyudad.
Ang maong duwa wala mamatngoni nga usa ka championship game tungod kay grabeng nakakuso-kuso ang RCAF nga milabaw og 20 puntos sa iskor nga 61-41 paghuman sa third quarter. Dili hapit maduol ang kainit sa RCAF ug wala kini mohatag og higayon nga makalabaw ang LBSM sulod sa 40 minutos nga kumbati. Si Rommel Garcia mi-iskor og 14 puntos sulod lang sa fourth quarter ug maoy nangu sa RCAF sa kinatibuk-an niyang 25 puntos, samtang si
Dandre Baclay mitampo og 20 puntos. Ang kanhi USJ-R Jaguar nga referee na karon nga si Freddie del Campo ug si Alwen Tabasa miamot og 12 puntos matag usa alang sa maong kadaugan.
Ang LBSM gipangulohan ni Rowel Sumalinog sa iyang 25 puntos ug gisundan ni Tin Atillo kinsa miamot og 18 puntos.
Sa duwa alang sa ikatulong dapit, si Lito Navarro miposte og game-high 34 puntos aron pangulohan ang Coke Zero ngadto sa 110-106 nga kadaugan batok sa Garfield.
Miabag sab si Robert Abasolo pinaagi sa iyang 29 puntos, gisundan ni Allan Lim sa iyang 15 puntos.
Ang three-point artist nga si Jun Villar maoy nangu sa Garfield sa iyang 23 puntos uban ni Danny Estrera nga adunay 21 puntos.
Mikulit sab og double figures sila si Harry Chiong, Alex Bernaldez, Danny Mahilum ug Jeany Tabarpulos sa maong kapildihan.
PUNTOS MATAG USA
Unang duwa:
Coke Zero (110) -- Navarro 34, Abasolo 29, Lim 20, Monreal 8, Sullano 8, Gallardo 4, Cabasan 4, Tecson 3
Garfield (106) -- Villar 23, Estrera 21, Chiong 16, Bernaldez 16, Mahilum 12, Tabar 10, Chan 8
Ikaduhang duwa:
RCAF (93) -- Garcia 25, Baclay 20, Del Campo 12, Tabasa 12, Faunillan 6, Daclan 6, Lazaga 5, Dignos 4, Erana 4
LBSM (84) -- Sumalinog 25, T. Atillo 18, Panique 10, Bacalla 10, Ciabo 9, Arias 4, Abellar 2, B. Atillo 2, Paez 2, Vergara 2