Gorres, Tuñacao midaog

Mikulit og managlahing kadaugan sila si International Boxing Federation Intercontinental super flyweight champion Z 'The Dream' Gorres ug  kanhi WBC flyweight titlist  Malcolm 'Eagle Eye' Tuñacao  batok sa ilang tagsa-tagsa ka kaatbang gikan sa  Africa atol sa "One More Time"  boxing card niadtong Sabado sa gabii didto sa Pacific Grand Ballroom sa Waterfront-Cebu City Hotel.

Nadan-agan ang dalan ni Gorres nga moaway og world title human gipilde si Universal Boxing Organization (UBO) bantamweight crown-holder Nick Otieno sa ilang 10 ka hugna nga engkuwentro, samtang si Tuñacao  kinsa mibalik og katkat sa ring gikan sa 16 ka buwan nga pahulay mipaundang sud lang sa usa ka hugna ni Tanzanian national champion Rashi Ally.

Si Gorres mipatugpa og   mga solidong kumo, apan kulang kini sa kusog aron mapatumba si Otieno.

Hinuon, ang tulo ka hurado pulos mi-iskor og 100-90 ngadto ni Gorres, kinsa miinat sa iyang baraha ngadto sa 28-2-2 win-loss-draw uban ang 15KOs.

Gumikan niini,  misibaw og maayo ang kahigayonan ni Gorres nga mohagit sa modaog  sa away ni defending champion Dimitri Kirilov sa Russia ug Vic Darchinyan sa Australia karong Agosto 2 alang sa IBF jr bantamweight title sa dili pa matapos ang tuig.

Sa laing bahin, si Tuñacao mipalandig og makabungog nga  walang kumo sa dughan ni Ally nga nakapaaghat sa bisitang boksidor sa pag-undang kay   nagmu kini  tungod sa kasakit.

Human sa makuti nga pakisusi sa ringside physician,  si referee Ben Necessario mihunong sa away kay si Ally dili na mahimong mopadayon pa sa pagkig-away.

Ang nakaangkon og dakung kadaugan sa maong boxing card mao si Jason Pagara, kinsa mipakita  og impresibong away sa labing una niyang higayon ubos sa landong sa ALA Stable pinaagi sa TKO ni Heri Andriyanto  sa wala pa sugdi ang third round aron paglangkat sa korona sa WBO Youth lightweight.

Ang 16-anyos nga si Pagara mikulit sa iyang ngan sa kasaysayan  isip labing bata nga WBO regional champion.

Ang presensiya ni Misamis Oriental Governor Oscar Moreno nakadasig sa away  ug  nakatampo sa kadaugan sa masaarong si Pagara nga lumad nga taga-Cagayan de Oro City.

Lain pa nga midaog  mao si Jether Oliva sa General Santos human gipilde si Jason Rotoni sa Elorde Gym pinaagi sa unanimous decision, si Juan Miguel Elorde midaog sab batok ni Racem Laud pinaagi  gihapon sa unanimous decision, si Romeo Jakosalem mipaundang ni Elmer Colve sa ikalimang hugna, si Jerson Mancio mao sab ang mipatigbabaw batok ni Ratazu Matzui sa Japan, samtang ang away nilang Jun Intor ug Ali Belonquel miresulta sa majority draw.