Ornopia naghari 3 ka dibisyon sa 4th Castrol Motocross Cup

Gilumpong ni Seigfred Ornopia ang tulo ka korona sa 4th Castrol Motocross Invitational Cup nga tipik sa 2008 MS Motosuit Motocross Series niadtong  Domingo didto sa Dipolog.

Si Ornopia sa Keiz BJ Motorsales and Services nga naghari sa executive A sa Mayor Yvonne Cabaron Cup niadtong Mayo 17 didto sa Moalboal, milangkat sa titulo sa executives A, B ug executive open circuit race sa 8th leg sa MS Motosuit series.

 Naghari gihapon si Ornopia sa executive A dihang iyang gidominar ang aksiyon batok nilang Nonoy Patriarca ug Jun Enriquez. Napuhalan sab ni Ornopia ang katakus nilang Jordan Bantingan ug Allan Ranillo aron pagdominar sa executive B. Iya sab nga nasakmit ang titulo sa executive open dihang gipanglupig niya ang iyang mga karibal.

Sa laing bahin, si Irwin Ramas-Uypitching, kinsa nahiagum sa iyang labing unang major injury sa Dipolog sa miaging tuig, misulbong sa iyang pagbalik diin milangkat kini og duha ka titulo nga maoy iyang labing unang kadaugan sa 2008 MS Motosuit Motocross Series.

Si Uypitching, ang unang MS Motosuit “Rider of the Year” mipukan ni Pepo Rubi aron pagsakmit sa titulo sa experts class, diin si Ted Conde mipahiluna sa ikatulo. Iya sab nga gipilde si Conde aron pagsakiyo sa titulo sa intermediate class, samtang si Kimboy Pineda maoy milangkat sa ikatulo nga

dapit.

Lain pang naghari sa maong kompetisyon nga gipaluyohan sa Imarflex Evvo Motorcycle Battery mao sila si Bantingan sa executive C, Keith Galaura sa mini class, Bobong Catipay sa novice production, Michael Desbaro sa local enduro ug Jevin Lagrada sa beginners production.