Sinukliay'g  mga pulong sa mga tadhang boksidor

Gipaabot nga magsinukliay sa ilang mahait nga pulong ang mga boksidor nga mo-away sa gikahinaman nga "One More Time" card nga gipangulohan nilang IBF Intercontinental super flyweight champion Z 'The Dream' Gorres ug kanhi WBC flyweight titlist Malcolm 'Eagle Eye' Tuñacao sa final press conference karong adlawa.

Ang kalihukan gikatakda  sa alas 11:00 sa buntag sa Golden Cowrie Restaurant sa Salinas Drive ug  duol ra sa binyu sa maong eksplosibong engkuwentro karong Sabado sa gabii sa Pacific Grand Ballroom sa Waterfront-Cebu City Hotel and Casino.

Si Gorres (27-2-2-, 15KOs) maoy mowadwad sa main event diin iyang sangkaon si UBO bantamweight champion Nick 'Black Sugar' Otieno (15-1, 5KOs) sa Kenya sa 10 ka hugna nga non-title fight.

Samtang si Tuñacao (26-2-3, 14KOs) mobalik sa natad sa pamuksing human sa 16 ka bulan nga pahulay. Iyang pamatud-an nga wala pa tay-i ang iyang abilidad sa iyang pakigharong ni Tanzanian Professional Boxing Commission champion Rashid Ally (11-9-7, 2KOs).

Lain pang angayan nga lantawon sa mga mahiligon  og boksing mao si Jason Pagara, ang 16-anyos nga bag-ong kaplag nga talento sa ALA Stable. Si Pagara mo-away sa labing unang higayon  ubos  sa ALA Gym  batok ni Indonesian Heri Andriyanto (11-3-1, 7KOs) sa  12 ka hugna nga binukbukay alang sa bakanteng WBO Youth lightweight title.

Lain pang paresan nga magpinaksitay sa undercards mao sila si Jether Oliva vs. Jayson Rotoni, Jun Intor vs. Ali Belonguel, Juan Miguel Elorde vs. Racem Laud, Romero Jakosalem vs. Elmer Colve ug Jerson Mancio vs. Ratazu.

Ang mga tiket mapalit sa ALA Gym BTC (416-2011), Islands Souvenirs Ayala (231-2581) ug SM City Cebu (232-1906), ug Bisaya Ispesyal Ayala (231-2376) ug SM City Cebu (232-0610).

Ang mga tiket nagkantidad og P1,500 alang sa VIP 1st row, P1,250 sa VIP 2nd row, P1,000 sa 3rd row, P750 sa 4th row, P550 sa ringside, P350 sa ballroom ug P250 sa balcony.