Milutaw ang kabugnaw sa kolor sa Baby Pink dihang ilang gipukan ang Maroon sa overtime, 50-48 sa nagpadayong aksiyon sa Barangay Sta. Cruz Inter-color Sports Tournament niadtong miaging gabii didto sa Pelaez extension basketball court sa Barangay Sta Cruz, ning siyudad.
Gikontrolar sa Maroon ang unang-tulo ka kuwarter, hinuon wala kini makabiya og daku sa Baby Pink sa matag kuwarter. Igo lang milabaw og dos puntos ang Maroon sa paghuman sa first ug second quarter, 10-8 ug 16-14 ug uno punto lang ang nahimo nilang labaw sa third quarter, 24-23 nga nakapakulba sa mainitong kumbati nga miresulta sa panagtabla, 39-all ug mihatod sa duwa ngadto sa overtime.
Sa dugang singko minutos, namugas na og maayo ang Baby Pink ug wala na kini mohatag og gamay’ng kompiyansa aron maangkon ang kadaugan.
Nangulo sa Baby Pink mao si Rey Tinapay kinsa miposte og 14 puntos, samtang ang topscorer sa pilderong Maroon mao si Gilbert Gallardo sa iyang 17 puntos.
Ang summer league gipasiugdahan sa Sangguniang Kabataan (SK) ubos sa liderato ni Catherine Bas uban ni Bgry. Sta. Cruz Councilor Vicente Quintana, ang chairman sa committee on sports.
PUNTOS MATAG USA
BABY PINK (50) -- R. Tinapay 14, Pasumala 11, O. Cabiluna 7, D. Sanchez 6, A. Llacuna 5. C. Emborong 2, A. Dabon 2
MAROON (48) -- G. Gallardo 17, JC. Soycano 10, M. Villarico 8, DJ. Tabelon 5, J. Larona 4, M. Subang 2, B. Dabon 2