Dommy 'Toy Bulldog' Ursua mitaliwan na sa laing kalibotan

Mitaliwan na sa laing kalibotan ang usa sa labing isog nga mga boksidor sa nasud nga si Dommy ‘Toy Bulldog’ Ursua.

Si Ursua, 72, namatay tungod sa sakit nga dugay na niyang giantos niadtong Domingo sa hapon.

Ang maong pahisubo gipadangat dinhi sa Banat News  ni boxing patron Antonio ‘Bidoy’ L. Aldeguer, kinsa mipasiugda og fund-raising campaign aron itabang sa mga galastohan sa pagpalubong ni Ursua  ug ingon man paghatag og hinabang pinansiyal alang sa iyang asawa.

Si Ursua niaway og kaduha  alang sa world title apan napilde kini. Nahagba siya sa 11th round TKO decision ngadto ni Raul Macias sa ilang National Boxing Association World bantamweight title bout niadtong Hunyo 15, 1957 didto sa Cow Palace sa San Francisco, California.

Napilde sab siya pinaagi sa unanimous decision ngadto ni Pascual Perez sa ilang 15-round nga engkuwentro alang sa world flyweight championship niadtong December 15, 1958 didto sa Manila.

Human sa  maong kapakyasan, si Ursua miretiro gikan sa pamuksing niadtong 1961 bitbit ang 26-28 win-loss record diin 20 sa mga daog pinaagi sa knockout sa iyang siyam ka tuig nga boxing career.

Ang haya sa patay'ng lawas  ni Ursua anaa karon sa St. Francis Funeral Homes. Ang lubong ipahibalo ra unya.