Buksan na ang gipaabot nga SK Barangay Sapangdaku Summer League 2008 karong adlawa sa alas-9:00 sa buntag diha sa Sitio Lupa basketball court sa Sapangdaku, Guadalupe, ning siyudad.
Si Sapangdaku SK chairman Adroel Jay Gacayen maoy mangulo sa opening ceremonies uban sa Barangay Council ubos sa liderato ni Brgy. Capt. Henreo G. Labra.
Sugdan ang kalihukan pinaagi sa usa ka parada nga manukad sa tulay sa Sitio Mohon paingon ngadto sa Sitio Lupa Basketball Court diin adto himuon ang programa.
Molamas sa maong kalihukan mao ang
pagpili og "Miss SK Sapangdaku Summer League 2008."
Adunay 22 ka teams ang mosalmot sa maong liga -- 11 niini gikan sa basketball ug laing 11 gikan sa volleyball event.
Magsakbang sa basketball ug volleyball mao ang Sitio Kadianoy, Sitio Kaimitohan, Sitio Lupa, Sitio Arkos, Sitio Riverside, Sitio Napu, Sitio Kabading, Sitio Lanibaw, Sitio Mohon, Sitio Luay ug ang Sitio Kabarang.
Matud pa ni Gacayen, nga giumol ang maong liga aron magkahiusa ang tanang sector sa ilang dapit, malayo sa ginadiling drogas ug aron adunay luna ang mga batan-on sa pagpalambo sa ilang physical ug mental health.