Inoc hero sa San Nicolas
Ang duha ka free throws nga napasulod ni Michael Inoc sa katapusang 1.4 segundos maoy mihatod sa San Nicolas Proper ngadto sa kadaugan batok sa Pasil, 80-77 sa seniors division sa nagpadayong Inter-Barangay Summer League didto sa Suba Pasil gym.
Sikit kaayo ang duwa gikan sa pagsugod ug ang duha ka kampo nagbinayluay og mga puntos hinungdan nga igo lang milabaw og uno punto ang San Nicolas sa first half, 36-35.
Ang mga sinaligan sa Pasil nga sila si Alfie ug Mark Adrian Dagohoy nagkumboya og 12 puntos aron ilugon ang tres puntos nga labaw, 59-56 sa third quarter. Apan ang San Nicolas wala magpa-alkanse ug mibawos og pabuhagay og puntos aron angkonon og balik ang labaw, 78-77.
May purohan pa unta nga maangkon sa Pasil ang daog, galing lang nakahimo kini og turnover sa nahabiling dos segundos.
Ang giposa nga duha ka free throws ni Inoc maoy miselyado sa kadaugan.
Puntos matag
San Nicolas Proper (80) -- M. Inoc 17, A. Agdasa 15, R. Martinez 10, J. Abarca 10, G. Sianson 6
Pasil (77) -- A. Taneo 18, M.Dagohoy 17, W. Estorba 15, J. de la Cruz 5, J. Socobos 2
- Latest
- Trending
