Mirehistro na sab og double victory si Glenn Aguilar sa 2008 MS Motosuit Motocross Series pinaagi sa Mayor Yvonne Cabaron Cup didto sa Moalboal niadtong Sabado.
Natagbaw ni Aguilar ang mga dumuduong nga misaksi sa seventh leg sa tinuig nga series nga gipasiugdahan ni MS Motosuit big boss Lou Ornopia.
Unang nakuha ni Aguilar ang double victory niini nga series sa Mayor Agustino Cup didto sa Ayungon sa Oriental Negros sa sayong bahin ning bulana.
Gipabuhagay ni Aguilar ang iyang kusog ug kaigmat aron pagpuhal ni Irwin Uypitching sa pro class nga nipuwesto sa ikaduhang dapit, samtang si Jon-Jon Adlawan napunta sa ikatulo.
Wala sab magpabangbang si Aguilar sa experts division aron paglangkat sa ikaduhang titulo.
Si Uypitching wala makabawos sa iyang kapildihan ngadto ni Aguilar, apan iyang nalabwan ang kaabtik ni Adlawan aron pag-angkon sa ikaduhang luna sa experts division.
Sayag gihapon ang dagway ni Adlawan dihang ilang gisakmit ang intermediate title batok ni Weng Yapparcon kinsa miangkon sa ikaduhang dapit. Si Rex Barbaso maoy mi-okupar sa ikatulo.
Sa iyang bahin, si Donkey Sanchez, miugkat og duha ka korona ug usa ka runner-up finish.
Naghari siya sa novice open enduro ug local enduro pulos batok nilang Bonnie Bustillo ug Ryan Quirol, kinsa pulos sab nahimutang sa ikaduha ug ikatulong dapit.
Pakyas hinuon si Sanchez sa iyang tinguha paglansang og triple victory dihang ikaduha lang siya sa open production nga gidominar ni Ryan Alquisola, samtang si John Flores maoy miangkon sa ikatulo nga dapit.
Si Alquisola misakiyo sa mini class title batok nilang Keith Galaura ug Martin Nuñez.
Ang father-and-son nga sila si Seigfred ug Bryle Ornopia nanghawod sab sa ilang tagsa-tagsa ka dibisyon.
Si Seigfred sa Keiz BJ Motorsales and Services maoy naghari sa executive A, samtang si Bryle nakahimo sab og dakung impact pinaagi sa pagdominar sa peewee class.
Ang managsuong Sicad nga sila si Gener ug Iting maoy mibira sa titulo sa executive B ug C, samtang si Clark Wagas maoy kinakusgan sa novice open production.