Sitio Omega, Riverside gisubha'g daog

Gilihian dayon og daog ang Sitio Omega ug ang Sitio Riverside batok sa ilang tagsa-tagsa ka kaatbang sa pagsugod sa Pahina Central Summer Basketball League niadtong Domingo didto sa Pahina Central basketball gym.

Ang Sitio Omega mipukan sa Sanciangko sa iskor nga 79-71 sa juniors division, samtang  ang Sitio Riverside milubong sa Sitio Guani sa iskor nga 47-35 sa duwa sa midget division.

Upat ka magduduwa sa Sitio Omega ang mikulit og double figures nga gipangulohan ni Junjun Jacalan  sa iyang 16 puntos, gisundan ni  Rosmelo Albaracin kinsa mitunol og 15 puntos ug nilang Bing Matunhay  ug Ronnel Garcia nga pulos miamot og 13 puntos.

Ang pilderong Sanciangko gipangulohan ni Baday Emraces nga miposa og 24 puntos, samtang si Joshua Ardiente mitampo og 15 puntos.

Sa laing bahin, ang Sitio Riverside kinsa milumbong og 13 puntos sa Guani sa unang kuwarter, 20-7 gipangulohan ni J. Nicoi sa iyang 21 puntos.

Ang basketball summer league usa ka programa  sa  Brgy. Pahina Central  ubos sa liderato ni Brgy. Capt. Bebs Andales.