USC, Team GGC miangkon korona sa 1st Mayor Duke Frasco Volley Open

Gipukan sa University of San Carlos (USC) Warriors ug Team GGC ang ilang managlahing kaatbang aron paglangkat sa korona sa 1st Mayor Duke Frasco Volleyball Open  niadtong miaging gabii sa Lilo-an gym.

Ang batan-ong USC Warriors ni coach Eugene dela Cerna nagpaila nga maoy hawod dihang ilang gipilde ang taas na kaayo'g kasinatian nga  Lilo-an Designer’s Team sa tulo ka sets, 29-27, 25-22, 25-15.

Ang reigning Cebu Schools Athletics Foundation Inc. (CESAFI) champion nakaagi og lima ka slides sa wala pa nila maangkon ang first set, 29-27 tungod sa mabangis nga mga atake ni two-time Cesafi MVP ug USC team captain Roderick Arenasa uban sab sa hugot nga depensa nilang Edward Carlo Tecson, Jesriel Pino, Kenneth Bensig, Michael Alilin, Dexter Tuazon, Bonvie Estrera, Jerone Maestre ug Ramil Espinosa.

Ang Designer’s Team ni Jhunrey Sasing   nakabawi ug nakalabaw pa sa sayong bahin sa second set. Apan ang high-flying attacks ni Sasing napugngan sa USC Warriors, kinsa mitak-op sa second set, 25-22.

Sa paningkamot nilang Sasing, Angelan Visoc ug Maynard Alejandrino, ang Designer's Team nakatabla, 11-all sa katapusang hugna, apan ang USC Warriors mi-rally aron pag-abante og balik, 14-11. Sukad niadto wala na makasikit ang Designer's Team.

Sa  pikas bahin, ang Team GGC   miagi pa og kalisud una nila malangkat ang korona batok sa Team Consolacion, 20-25, 16-25, 25-20, 25-12, 15-11.

Daw wala sa maayong kondisyon ang GGC Team sa nag-unang duha ka sets  kay nakahimo kini og daghang sayop nga nakahatag og bentaha sa Team Consolacion nilang Marites Natad, Arlene Maloloy-on, Quennie Rivera, Syrel Rivera, Cheche Bohol, Susan Yuson ug Irene Montesino, 25-20- 25-16.

Apan ang high-spirited Team GGC mibawos dihang mibukal ang ilang kainit  sa ikatulo ug ikaupat nga sets 25-20, 25-12  kortesiya nilang Janeth Ponte, Jusabelle Brillo, Janez Armie Ygot, Florianne Gutierrez, Kennette Garces, Marissa Lagancia, Elene Pongase, Gwendolyn Gutang ug Kimberly Gendrauli-Dabatos.

Sa deciding set, ang duha nagpuli-puli na og ilog sa labaw  apan nasanta kini human magkatabla,  9-all dihang mi-rally ang GGC Team, 12-9 nga nakatabang pagpalukapa sa Team Consolacion.

Sa laing bahin, ang Team Talisay ug ang University of Southern Philippines Foundation (USPF) Lady Panthers maoy miangkon sa ikatulo  human gipilde ang Team Paul Yu, 25-20, 25-21, 17-25, 23-25,17-15, samtang ang USPF belles mipilde sa Team Paul Yu, 12-25, 25-18, 25-17, 25-18.