Mga dekalibreng volleyball teams sa Sugbu mag-abot karon

Magtige karong adlawa ang mga dekalibreng volleyball teams dinhi sa Sugbu alang sa katapusang lingkoranan sa 1st Mayor Duke Frasco Volleyball Open didto sa Lilo-an gym.

Sugdan ang duwa sa semifinal sa alas-8:00 sa buntag. 

Ang two-time Cebu Schools Athletic Foundation, Inc. (CESAFI) champion University of San Carlos (USC) moharong sa Paul Yu sa unang duwa, samtang ang Talisay Selection mosangka sa Liloan's Designer sa laing duwa sa men's division.

Sa women's category, ang undefeated GGC Team mohamag sa Paul Yu, samtang ang University of the Philippines Foundation (USPF) makigsangka  batok sa Consolacion Selection.

Ang USC Warriors mikuha sa serbisyo ni two-time CESAFI MVP Roderick Arenasa, Edward Carlo Tecson, Kenneth Bensig, Jerone Maestre, Jesriel Pino ug Ariel Carumba.

Wala sab magpabitin ang Liloan's Designer ug ilang gikuha ang high-flying nga si Jhunrey 'Air' Sasing, samtang ang Talisay magsalig sa abilidad ni University of the Visayas (UV) coach Henji Tomales, Loujie Tipgos ug Norvie Labuga.

Sa pikas bahin, ang GGC pangulohan ni Southwestern University (SWU) coach Janeth Ponte, Kenneth Garces, Marissa Lagancia, Jusabelle Brillo, Janez Armie Igot, Florian Gutierrez, Joreem Sanchez, Julette Marikit ug Michelle Matuguina.

Ang Sports Association of Cebu (SAC) awardee  nga si Danika Gendrauli, Ericka Camille Verano ug Herelene Ybarita maoy modala sa ngan sa USPF.

 Ang 1st Mayor Duke Frasco Volleyball Open gipasiugdahan sa Lilo-an local government uban sa suporta sa GUV CUP/Cebu Volleyball Association (CEVA).