Mosikad na ang 2nd Cebu Beach  Soccer

Mosikad  na karong buntag ang gipaabot nga 2nd Cebu Beach Soccer Competition sa Basdaku, Moalboal sa habagatang bahin sa Sugbu.

Adunay kinatibuk-ang 32 ka teams ang mosalmot sa duha ka adlaw nga kompetisyon -- 22 sa men’s division ug 10 sa women’s division.

Mangulo sa mga entrante mao ang San Roque Football Club, ang defending champion sa duha ka dibisyon.

Gipaabot sab ang duha ka bisitang koponan nga mohatag og lisud nga duwa ngadto sa mga lokal. Kini mao ang San Carlos City sa men’s division ug La Salle Alumni sa Bacolod sa women’s division.

Lain pang moduwa sa men’s division mao ang Football Club-International Cebu, San Roque Royale United, University of Southern Philippines Foundation, Cebu State College of Science and Technology, Balamban, Mongers, Queen City United, XP or expats, Danao, Bangan, Barili, Don Bosco Lawaan, SJB, Cravings, Kapuge ug ang host Moalboal.

Lain pang mga entrante sa women’s division mao ang Melbourne, Turnbouts, La Niña, Marlow ug Don Bosco.

Gawas sa mga ganti, ang maong kompetisyon ubos sa Cebu Football Association (Cebu-FA) magsilbe sab nga selection alang sa Cebu Team nga morepresentar sa National Open karong Mayo 31 ug Hunyo 1 sa San Carlos City.