Walay laing miturok sa alimpatakan ni WBC lightweight champion David Diaz kondili ang pagdaog sa iyang pagdepensa sa trono batok ni three-division world champion Manny Pacquiao sa gubat sa mga kampiyon nga maoy main event sa gi-atngan nga "Lethal Combination" card karong Hunyo 28 sa Mandalay Bay Resort and Casino sa Las Vegas, Nevada.
Matud pa ni Diaz nga iladlad niya ang tanang abilidad nungka nga mapilde siya ni Pacquiao.
Mismo si Pacquiao miangkon nga si Diaz maoy labing lisud nga away sa iyang career.
"It's a tough fight because of his style (left-handed) and because he has a will to win. Those are things I have to overcome in this fight. The one good thing is that Diaz likes to fight toe-to-toe, which is what I like too," matud pa ni Pacquiao.
Apan sa regular niyang lindog nga "Kumbinasyon" nga napatik sa philboxing.com kagahapon, si Pacquiao mipadayag nga determinado ug mailog niya ang bakus ni Diaz.
"But many times, boxing matches end up with one fighter winning and the other losing. This is our business, to give the boxing public the best show and the best fight, that is why I will train hard in order for me to take his belt," dugang pa sa Pinoy ring legend.
Dili lamang garbo sa nasud ug personal niyang dungog maoy awayan ni Pacquiao gumikan nay naglaraw man sab siya nga mokulit og kasaysayan.
"Nalalaman ko na kapag nanalo ako sa laban na ito, ako ang kauna-unahang boxer sa Asia na mananalo ng apat na titulo sa apat na magkakaibang weight divisions," matud pa sa kasamtangang WBC ug Ring Magazine super featherweight titlist nga si Pacquiao.
Kaniadto, si Pacquiao maoy naghari sa WBC flyweight ug sa IBF super bantamweight divisions.
Nagkanayon si Pacquiao nga dili siya mokompiyansa ni Diaz bisan og siya maoy paborito.