Nakabangon ang University of the Visayas (UV) human masukarap sa first set aron pagpukan sa ilang mortal nga karibal Southwestern University (SWU) sud sa tulo ka set aron paglangkat sa labing unang kampiyonato sa 1st San Remigio Beach Volley Open kagahapon.
Nasukamod sila si Jusabelle Brillo ug Janez Armie Igot sa first set, 21-17, apan mipakita kini og kaisog sa duwa ug nakabawi kini aron pagpukan sa tandem nilang Janelle Tabio ug Florianne Gutierrez sa second set, 21-18 aron pagpuwersa ngadto sa deciding game.
Sa ikatulong set, hugot na kaayo ang engkuwentro sa duha ka kampo ug nagdudasingot kini tungod sa kainit sa haring adlaw nga mitabon kanila. Apan bisan pa niini, sila si Brillo ug Igot wala magpaanod sa kaluya aron pag-angkon sa 15-12 nga kadaugan batok nilang Tabio ug Gutierrez, ang reigning Nestea Beach Volley champion.
"My players were not only in top condition, but were also very determined to win. I'm very happy that they fought hard for the championship. They really deserved it," matud pa ni UV coach Raffy Briones.
Ang maong kadaugan maoy tam-is nga panimalos sa mga batos ni Briones nga gipakanaog sa trono sa mao gihapon nga kaatbang sa Nestea Beach Volley Season 12 niadtong miaging buwan didto sa Boracay Island.
Sila si Brillo ug Igot mibulsa og P7,000, samtang sila si Tabio ug Gutierrez nakadala og P5,000.
Sa gubat alang sa ikatulong dapit, sila si Erika Camille Verano ug Danika Yolanda Gendrauli sa Jordan Paca-mentored University of Southern Philippines Foundation (USPF) maoy mipatigbabaw batok nilang Kennette Garces ug Marisa Lagancia sa Volleybelles, 25-17. Sila si Verano ug Gendrauli miangkon sa P3,000, samtang sila si Garces ug Lagancia nakadawat og P1,000.
Ang ubang mga partisipante gihatagan og P500 matag usa.
Ang duha ka adlaw nga kompetisyon nga kabahin sa "Lapyahan Festival" sa maong lungsod, gipasiugdahan sa municipal government sa San Remigio ubos sa liderato ni Mayor Mar Martinez uban sa pag-abag sa Cebu Volleyball Association (CEVA) ug Governor Gwen Garcia Unity Volleyball (GUV) Cup.