SWU, UV nakasulod na sa semifinal

Naka-entra na sa semifinal round ang Southwestern University (SWU) ug ang University of the Visayas (UV) human sa  kadaugan batok sa  managlahi nilang kaatbang sa 1st San Remigio Beach Volley Open kagahapon didto sa San Remigio sand courts.

Ang bag-ong gikoronahang Nestea Beach Volleyball national champions nga sila si Janelle Tabio ug Florian Gutierrez maoy nag-una sa Bracket sa ilang 3-0 nga baraha. Gipukan nilang Tabio ug Gutierrez ang pambato sa Volley Gals nga sila si Marites Natad ug Christine Rose Bohol, 25-18.

Sa sayo pa, ilang gipukan ang Atenians nilang Michelle Gemarino ug Jovy Abellana, 25-7. Sa una nilang duwa, midaog sila batok sa USFP nilang Ericka Camille Verano ug SAC awardee  Danika Gendrauli, 25-21.

Sa pikas bahin, ang UV nilang Jusabelle Brillo ug Janez Armie Igot mikulit sab og 3-0 nga baraha. Sila si Brillo ug Igot mipukan nilang Jeremie Montalvo ug Juvie Glipo sa University of San Carlos, 25-15, April Tamayo ug Irene Montesino sa XOXO team, 25-29 ug Marissa Lagancia ug Kenneth Garces sa Volleybelles, 25-13.

Bisan pa sa ilang kapildihan, ang USPF ug Volleybelles mopasilong gihapon sa semis human kini mitapos sa ikaduha sa ilang tagsa-tagsa ka bracket.

Sa duwa sa semifinals, ang SWU moharong sa Volleybelles, samtang ang UV moharong sa USPF alang sa ikaduhang duwa.