Mga tang-an sa Sugbu moapil

Mopakita na sab sa ilang katakus ang mga tang-ang beach volley players sa Sugbu sa ipahigayong 1st San Remigio Beach Volley Open karong  adlawa diha sa San Remigio sand courts sa amihanang bahin sa Sugbu.

Walo ka teams ang mag-ilog sa kampiyonato nga gipangulohan sa bag-ong gikoronahang Nestea Beach Volley champs Florianne Gutierrez ug Janelle Tabio sa Southwestern University (SWU).

Mosalmot sab ang ilang karibal nga University of the Visayas (UV) nilang Jusabelle Brillo ug Janez Armie Igot.

Lain pang mga tunghaan nga mosalmot mao ang University of Southern Philippines Foundation (USPF) nilang Danika Gendrauli ug Erika Camille Verano ug University of San Carlos (USC) nilang Jeremie Montalvo ug Juvie Glipo.

Samtang mobanat gikan sa commercial squads naglakip nilang Marites Natad ug Christine Rose Bohol sa Volley Gals, Marissa Lagancia ug Kennette Garces sa Volleybelles, Michelle Gemarino ug Desiree Valiar sa Atenians ug  April Tamayo ug Irene Montesino sa XOXO.

Ang kampiyon mobulsa og P5,000, ang mopahiluna sa ikaduha makadawat og P3,000, samtang ang ikatulo makaani og P2,000.

Ang duha ka adlaw nga kompetisyon gipasiugdahan ni San Remigio Vice Mayor Niño Bascon uban sa pakig-alayon sa GUV CUP/Cebu Volleyball Association (CEVA) ubos sa liderato ni Glen Anthony Soco.