3rd CSA hoop misikad na

Pormal na nga gibuksan niadtong Abril 29, ang 3rd Cebu Sports Association (CSA) basketball tournament didto sa Vicente Sotto Memorial Gym sa barangay Punta Princesa.

Usa ka yano ug mubo nga programa ang gipahigayon diin sila si  Al Solis, assistant coach sa UV Green Lancers ug Art Burroughs, ang director sa Non-violent Communications maoy mga mamumulong ug mihatag sa ilang undanong mensahe ngadto sa mga entrante sa tagsa-tagsa ka koponan.

Napulo’g-usa ka teams ang misalmot sa tinuig nga torneyo. Ang mga partisipanteng koponan uban sa ilang team managers mao ang CSF/J-Art ni Anston Acedilla, Cebu Midtown Hotel ni Nelson Ybañez, San Remigio Beach Club nilang  Mark Anthony Ynoc ug Junrel Hortel, Bingo Club ni Pete Dabon, 50-Star Builders/Davies Paint nilang Orvil Lamayo ug Franky Ramirez, Aksiyon Radyo/GISA ni Pastor John Santamaria, Pardo Baptist ni Pastor Ablen, Black Arrow/Security Agency ni Buboy Rosito, Umapad-Mandaue ni Pastor Jason Magalona, Eistrup Company ni Richard Recasas ug Falco-RCAF ni Romeo Faunillan.

Si CSA  chairman Engr. Julius Romarate uban sa iyang vice chairman nga si Santamaria ug kaubanan maoy mihimo sa ceremonial toss timaan sa pagsugod sa torneyo.

Sa opening game, ang Cebu Midtown Hotel milansang sa ilang unang daog pinaagi sa pagpukan sa Aksiyon Radyo/GISA sa iskor nga 74-67.

Si Mercol Abellanosa maoy nangulo sa maong kadaugan nga mirehistro og 18 puntos, gisundan nilang Marvin Ancajas ug Mark Apa nga miabuno og 16 puntos matag usa.

Ang pilderong Aksiyon Radyo/GISA gipangulohan ni Jobes Galon kinsa mipupo og 16 puntos.